2024 йил 12 сентябр куни Тошкент шаҳрида Инвестиция институтлари миллий уюшмаси (ИИМУ) ва Cbonds томонидан ташкил этилган «Ўзбекистон Республикасининг капитал бозори» мавзусидаги олтинчи халқаро конференция бўлиб ўтди.

Тадбирда 200 дан ортиқ Ўзбекистон, Қозоғистон, Грузия, Россия ва бошқа МДҲ давлатларидан келган қимматли қоғозлар бозори иштирокчилари, жумладан, инвестиция компаниялари, эмитентлар, финтех-фирмалар, шунингдек, АҚШ ва Европа мамлакатларидан экспертлар иштирок этдилар.

Конференция дастури капитал бозорини тартибга солиш ва ривожлантиришнинг барча жиҳатларини қамраб олди, жумладан, альтернатив инвестиция воситалари ва ислом молияси ривожланишига алоҳида эътибор қаратилди.

Капитал бозорини тартибга солиш ва унинг инфратузилмасига бағишланган асосий секцияда фонд ва валюта биржалари раҳбарлари, Марказий депозитарий ва Давлат активларини бошқариш агентлиги (Давактив) раҳбарлари чиқиш қилишди. Мазкур очиқ суҳбатга ИИМУ раиси Баҳодир Атаханов модераторлик қилди. Шунингдек, ушбу секцияда облигациялар бозори муаммолари негизи ҳақидаги модераторнинг саволига Ўзбекистон Республикаси Истиқболли лойиҳалар миллий агентли (ИЛМА) директорининг биринчи ўринбосари Вячеслав Пак изоҳ берди.

Мамлакат иқтисодиёти ривожланишида капитал бозорининг роли ҳақида Гарвард университети доктори ва Техас университети (АҚШ) профессори Ботир Кобилов маъруза қилди. Ўзбекистон бўйича макроиқтисодий прогнозларни Barclays Bank (Буюк Британия) бошқарувчи директори Игорь Акулов тақдим этди.

«Акция ва облигация эмитентларининг локал бозорларда имкониятлари» секциясида эса энг йирик миллий компаниялар — ЎзбекИнвест, Ўзметкомбинат ва Ўзбекистон республика товар-хомашё биржаси, шунингдек, Газпромбанк раҳбарлари чиқиш қилишди.

Таъкидлаш жоизки, конференция ИЛМА — капитал бозори, криптоактивлар ва суғурта фаолиятининг давлат регулятори қўллаб-қувватлови билан ўтказилди. Регуляторнинг иштирок этиб, сўзга чиққани бозор иштирокчиларига ўзларини қизиқтирган саволларга жавоб олиш имкониятини берди.

Фурсатдан фойдаланиб, ИЛМА, Давактив, Марказий банк ва Рақобатни ривожлантириш ва истеъмолчилар ҳуқуқларини ҳимоя қилиш қўмитасига тадбирдаги фаол иштироки ва Ўзбекистоннинг профессионал жамоатчилиги билан очиқ мулоқотга тайёрлиги учун ИИМУ миннатдорлик билдиради.